Pakistan Mein Seelab Kyun Aaty Hain? | Floods in Pakistan Explained
Assalam-o-Alaikum dosto! Main aapka host M. Ehtisham @NeedToKnow4u
Aaj hum aik aise sawal ka jawab dhoondne wale hain jo har Pakistani ke zehan me ghoomta rehta hai:
Pakistan main hi seelab kyun atay hain? Kya 1947 ke baad seelab shuru huay? Ya is zameen par pehle bhi yeh aafat aati thi? Aur kya duniya ke taraqi yafta mulkon me bhi aise hi tabahkun seelab aate hain?
Aaj sab kuch bilkul simple tareeke se samajhte hain.
Dosto, sab se pehle samajhna zaroori hai ke Pakistan banne se pehle yeh poora ilaqa “Bara-e-Sagheer Hindustan” ka hissa tha. Punjab, Sindh, Khyber, Kashmir — yeh sab wo ilaqay hain jahan se bade daria behte hain. Aur yaad rakhiye: darya jahan hota hai, wahan seelab ka risk hamesha hota hai.
Isliye Pakistan banne se pehle bhi is zameen par bohot se bade seelab aa chuke the — 1900 ka flood, 1928, 1929 aur 1944 ka bohot bada flood is ki misaal hain.
Lekin sawal yeh hai ke 1947 ke baad seelab zyada kyun barh gaye?
Iska jawab sirf ek nahi — kai factors mil kar yeh tabahiyan laate hain.
1: Zyada barsaat (Monsoon rains)
Jab barish apni limit cross kar jaye, to darya bhar jate hain aur pani apni purani raahon par phail jata hai.
2: Galyshiers ka tezi se pighalna
Northern Areas me glaciers aik tep se pighal rahe hain jo Pakistan ke daryao me achanak pani ka flow bohot barha deta hai.
3: Dams ki kami
Haqeeqat yeh hai ke Pakistan me mangla aur tarbela ke ilawa koi bara dam bana hi nahi. Pani rokne ki jagah hi nahi hoti — aur result hota hai seelab.
4: Band, levees aur river protection system kamzor
Purane band toot jate hain, aur unka maintenance mushkil se hota hai.
5: Jungleat ki katai
Jungle pani ko rokne ka natural system hotay hain. Jab darakht kat jate hain, pani directly beh kar seelab banata hai.
Aur sab se bada factor: MOSAMIYATI TABDELI (CLIMATE CHANGE)
Global warming actually hoti kaise hai?
Insaniyat ne zameen par carbon, smoke, factories, gaadiyaan, plastic, aur fuel ki waja se hawa me garm gases jama kar di hain.
Yeh gases suraj ki garmi ko andar laati hain magar bahar nikalne nahi deti — bilkul greenhouse jaisa effect.
Duniya garm hoti ja rahi hai.
Arctic glaciers pighal rahe hain.
Barsaaton ka system ulat gaya hai.
Kabhi kuch mahine tak barish nahi hoti, phir ek do din me aisi barsaat hoti hai jo saara intezaam hila deta hai.
Yeh climate change Pakistan ko duniya me sab se zyada effect karta hai — lekin interesting baat yeh hai ke:
Pakistan dunia ke un top mulkon me shamil hi nahi jo pollution phelate hain… lekin nuksan sab se zyada hame hi hota hai.
Ab thora Pakistan ki history ko dekhtay hain:
1947 ke baad Pakistan me lagbhag har 3–5 saal baad koi na koi bara seelab aaya.
1950, 1955, 1973, 1976, 1992, 2010, 2014, aur phir 2022 ka tabahkun seelab — jis ne mulk ka aik third hissa pani me doba diya.
Har govt ne wada kiya ke “hum dams banayenge”, “hum river system improve karengay”…
Magar 75 saal me aik bhi naya mega dam nahi bana.
Aaj bhi Pakistan ka 60% pani zaya ho kar samundar me gir jata hai, lekin hum seelab rok nahi paate.
Aur haan, 2025 ka flood bhi bohot logon ko mushkil me chhor gaya.
Kayi ilaqo me flash floods, glacier lake outburst floods, aur monsoon ke wave ne bohot se khandaan tabah kiye.
Jo seelab se mutasir hota hai… usay hi pata hota hai ke us par kya guzarti hai —
Ghar bar doob jata hai, bache bhookay rehte hain, janwar beh jate hain, saalgirah ki fasal aik din me tabah ho jati hai…
Aur phir humari posh areas ki kaum kehti hai, “Aray itna masla bhi nahi, sab theek ho jayega.”
Unhe kya pata ke doobti hui zindagi ka dard kaisa hota hai?
Sachi baat yeh hai dosto… seelab aate rahain gaye.
Jis din se darya bane hain, tab se.
Aap darya ki zameen par housing society bana den…
To darya pachas saal baad bhi apni zameen wapas le hi leta hai.
Pani apni raah khud banata hai — aur kisi ka intezar nahi karta.
Magar hum bach sakte hain — bas tab, jab hum:
→ darya ko uski asli zameen wapas dein
→ zyada dams banayen
→ jungleat ko wapas zinda karein
→ modern drainage system banayein
→ aur climate change ko seriously lein
Warna hamari aane wali nasalain bhi humari tarah har 3–4 saal baad seelab jhelti rahengi.
Jin ka koi kasoor nahi hoga.
Aakhir me sirf do lainain:
“Pani zindagi bhi deta hai… aur le bhi leta hai.
Faisla hum ne karna hai ke hum is zindagi ko sambhalte hain ya dubne dete hain.”
Video pasand aaye to Like, Share, aur Subscribe zaroor karein.
Apna khayal rakhein.
Khuda Hafiz.
Comments
Post a Comment